Vél Icelandair fór í loftið um tvöleytið

Flug Icelandair til Glasgow sem áætlað var að færi klukkan eitt í dag fór í loftið rétt eftir klukkan tvö, samkvæmt upplýsingum frá Guðjóni Arngrímssyni, upplýsingafulltrúa Icelandair.

Þær upplýsingar fengust hjá Flugstoðum að flugvélin hefði fengið heimild til sjónflugs, en heimild til blindflugs hefur ekki verið gefin frá Akureyrarflugvelli. Þegar um sjónflug er að ræða þá fá flugmenn svokallaða flugheimild eftir að hafa stýrt flugvélum út af svæðinu.

Gert er ráð fyrir að næsta flug Icelandair fari frá Akureyraflugvelli klukkan níu í kvöld. Iceland Express stefnir einnig á að fljúga í kvöld frá Akureyri ef aðstæður leyfa. Annars mun vélum Iceland Express verða flogið frá Egilsstaðarflugvelli.

Flugvöllurinn í Keflavík er lokaður vegna öskufalls. Þá hefur innanlandsflug legið niðri en athugað verður með flug frá Reykjavíkurflugvelli um klukkan þrjú.