Hefðu átt að fresta sjálfkrafa

Þeir viðskiptavinir Íslandsbanka sem tóku verðtryggð húsnæðislán árið 2005 hafa fengið send bréf þess efnis að nú sé komið að vaxtaendurskoðun. Vextir lánanna voru upphaflega 4,15 prósent en lánasamningar kveða á um rétt bankans til hækkunar vaxtaálags á fimm ára fresti. Með bréfinu fylgdi umsóknareyðublað þar sem lánþegar geta sótt um frest á vaxtaendurskoðunardegi til þriggja ára.

Lánþegi hafði samband við Fréttablaðið vegna þessa og lýsti yfir undrun sinni varðandi umsóknareyðublaðið.

„Ég tók lán upp á níu milljónir sem er nú tæpar tólf. Íslandsbanki vill hækka vextina upp í 5,6 prósent,“ segir hann. „Bankinn hefði átt að fresta þessu sjálfkrafa. Mér finnst þetta mjög ósmekklegt miðað við ástandið í dag.“

Sigrún Hjartardóttir, sérfræðingur á samskiptasviði Íslandsbanka, segir að fjármögnunarkostnaður bankans sé ekki sá sami og lá til grundvallar þeim vöxtum sem buðust þegar lánin voru tekin.

„Hins vegar er svigrúm margra lántakenda til að taka á sig hærri vexti einnig takmarkað,“ segir Sigrún. „Bankinn vildi koma til móts við viðskiptavini sína með því að gefa þeim færi á að fresta endurskoðuninni.“- sv