Formaður BÍ: Mótframboð kom á óvart

„Ég verð að viðurkenna að þetta framboð kom mér þó á óvart," segir Þóra Kristín Ásgeirsdóttir, formaður Blaðamannafélags Íslands, en henni hefur borist mótframboð í formannsembættið frá framkvæmdarstjóra félagsins, Hjálmari Jónssyni.

Hann hefur nú sinnt starfi framkvæmdastjóra um árabil. Hann sagði í viðtali við Vísi í morgun að hann byði sig fram nú vegna óánægju með formanninn sem hann hefur fundið fyrir. Auk þess sem hann sagði að það væri ágreiningur á milli hans og formannsins um starfsaðferðir og stefnumörkun.

„Hjálmar Jónsson hefur fullan rétt á því að bjóða sig fram til formennsku í félaginu. Ég hef viljað draga skýr mörk milli valdsviðs formanns og framkvæmdastjóra og um það hefur ekki verið sátt," segir Þóra Kristín meðal annars um ágreining formannsins og framkvæmdastjórans.

Hún bætir svo við: „Mér fannst satt að segja að framkvæmdastjórinn ætlaði að gegna báðum embættum. Nú hefur hann semsagt valið og ég reikna með því að hann ætli þá að segja starfi sínu sem framkvæmdastjóri lausu."

Kosið verður um embættið á aðalfundi félagsins sem verður haldinn næsta fimmtudag.