Nýtt myndband Steinda Jr. endar í blóðbaði

Fimmti þáttur af grínþættinum Steindanum okkar fór í loftið á föstudag. Steindi Jr. brást ekki aðdáendum sínum og var þátturinn drepfyndinn með mörgum óborganlegum atriðum.

Tónlistaratriðin í lok þáttanna eru orðin mjög vinsæl og bíður fólk þess í ofvæni að fá að sjá þau á netinu þegar líða tekur á vikuna. Fyrst kom lagið Newcastle United, svo Bransasögur, í síðustu viku lék Þorsteinn Guðmundsson snarbrjálaðan prest í Faðir Thug og nú er komið nýtt lag, Geðveikt fínn gaur.

„Þetta lag mun vonandi starta hreyfingu, þar sem ást tveggja gagnkynhneigðra karlmanna er í hávegum höfð. Age of bromance," segir leikstjórinn Ágúst Bent um lagið, sem er til dæmis komið í spilun á FM 957.

Í laginu hittir Steindi fyrir annan grínista, Ásgeir Orra Ásgeirsson. Steindi kannast við Ásgeir úr grínsketsum sem hann gerði í Verzlunarskólanum og Ásgeir er sömuleiðis aðdáandi Steinda.

Þeir hæla hvor öðrum í hástert en lenda á villigötum þegar þeir vilja sýna hversu vel þeir kunna við hvorn annan með því að taka söngvarann Friðrik Dór höndum. Myndbandið endar í blóðbaði og er því rétt að vara viðkvæma við því.

Hér má sjá Geðveikt fínan gaur.