Davíð Oddsson hafnaði bón Steinda Jr.

„Davíð passaði svo vel í þetta hlutverk. Hann átti að vera einn af nokkrum vinum persónu sem kallast Faðir Thug," segir grínistinn Steindi Jr.

Þátturinn Steindinn okkar hóf göngu sína á Stöð 2 síðasta föstudag. Steindi er þekktur fyrir að fá alls kyns fólk til að koma fram í þáttunum og ætlaði að fá Davíð Oddsson, ritstjóra Morgunblaðsins, til að leika sjálfan sig í stuttu atriði.

„Það var rosalegt vesen að ná í hann," segir Steindi. „Ég hringdi á hverjum einasta degi í viku - stundum oft á dag. Hann svaraði ekki. Þegar ég náði loksins í hann skellti hann á mig og hringdi til baka úr leyninúmeri. Við ræddum saman og honum þótti rosalega vænt um að fá að sleppa við þetta - eins og hann orðaði það."

Sannfæringarkraftur Steinda þykir ótrúlegur og frægt er þegar hann fékk veðurfréttamanninn Sigga storm og poppstjörnuna Haffa Haff til að leika par í atriði síðasta sumar. Steindi segir sárt að Davíð hafi ekki viljað taka þátt - en er engu síður ánægður með manninn sem sló til og lék einn af fjölmörgum valdamiklum félögum Föður Thug ásamt kraftakarlinum Magnúsi Ver. „Það var enginn annar en Ástþór Magnússon, maður fólksins," segir Steindi. „Hann gerði þetta með glöðu geði. Ég þurfti reyndar að selja honum hugmyndina, en atriðið er mjög saklaust."

Spurður hvenær sjónvarpsáhorfendur fá að sjá atriðið segir Steindi að það verði að koma í ljós. „Fólk verður bara að fylgjast með þættinum," segir hann að lokum.

- afb