Tugþúsundir á atvinnuleysisbótum

Framteljendum til skatts fækkaði í fyrra miðað við árið á undan að sögn ríkisskattstjóra. Hlunnindi og launatekjur þjóðarinnar lækkuðu um 38 milljarða króna milli ára en atvinnuleysisbætur hækkuðu um 16,7 milljarða.

Álagning ríkisskattstjóra nú er sú fyrsta eftir sameiningu skattumdæma um síðustu áramót. Í frétt frá embættinu segir að skil á framtölum hafi verið betri en síðustu ár. Áætla hafi þurft á mun færri einstaklinga en í fyrra eða 13.750 miðað við 22.330 framteljendur fyrir tveim árum.

„Í stuttu máli má segja að upplýsingar úr skattframtölum beri órækan vitnisburð um þau umskipti sem urðu í efnahagslífi þjóðarinnar haustið 2008," segir ríkisskattstjóri. „Nú töldu 27.638 manns fram atvinnuleysisbætur á skattframtali, margfalt fleiri en á undanförnum árum. Þá tóku 10.254 út séreignarlífeyrissparnað og 39.184 nýttu sér sérstakan rétt til að taka út séreignarlífeyrissparnað."

Tæpir 35,9 milljarðar króna voru greiddir úr séreignarsjóðum og tekjuskattstofninn hækkaði um 1,5 prósent milli ára þrátt fyrir að greidd laun hafi lækkað um 5,8 prósent.

Kærufrestur vegna álagningarinnar er til 27. ágúst.

- gar