Líf eftir Harry Potter

Emma Watson er þegar farin að leggja grunn að lífi eftir að Harry Potter-ævintýrinu lýkur en síðasta myndin um töfrastrákinn verður tekin til sýningar á næsta ári. Og þá þurfa leikararnir að finna sér eitthvað annað að gera.

Emma, sem nýlega varð tvítug, hefur samkvæmt breskum blöðum tryggt sér lítið hlutverk í stórmyndinni My Week with Marilyn en meðal mótleikara hennar í þeirri mynd yrðu Kenneth Branagh og Michelle Williams, ekkja Heaths Ledger.

Emma myndi leika aðstoðarkonu Colins Clark en hann var aðstoðarmaður sir Laurence Oliver þegar hann gerði kvikmyndina The Prince and the Showgirl með bandarísku þokkagyðjunni Marilyn Monroe. Sagan segir að Colin þessi hafi orðið hugfanginn af frú Monroe en myndin er byggð á ævisögu hans.

Samkvæmt heimildum bresku blaðanna gæti Emma, sem nú stundar nám í Brown-háskólanum í Bandaríkjunum, tekið upp sín atriði á tiltölulega skömmum tíma þannig að vinnan kæmi ekki til með að hafa áhrif á skólagönguna.