Verulega dregur úr tíðni leghálskrabba

Nýjum tilfellum af leghálskrabbameini hefur fækkað um meira en 70% hér á landi eftir að skipuleg leit hófst og dauðsföllum hefur fækkað um 90%. Þetta kemur fram í yfirlitsgrein um leit að leghálskrabbameini eftir Kristján Sigurðsson yfirlækni Leitarstöðvar Krabbameinsfélagsins. Greinin birtist í ágústhefti tímaritsins Cytopathology.

Í endursögn Krabbameinsfélagsins á greininni kemur fram að þessi árangur sé sagður hafa náðst vegna góðs skipulags og greiningar á forstigsbreytingum sjúkdómsins, á sama tíma og tíðni forstigsbreytinga hafi vaxið mjög mikið hjá ungum konum. Mikilvægt sé talið að konur mæti til leitar á tveggja ára fresti frá tvítugu til fertugs og á fjögurra ára fresti eftir það til sjötugs.

Eins og fréttastofa Stöðvar 2 og Vísis hefur greint frá í dag hefur dauðsföllum á Íslandi vegna brjóstakrabbameins líka fækkað um 45% síðustu ár. Hvergi í Evrópu hefur baráttan gegn brjóstakrabbameini gengið betur en hér. Ástæðan er rakin til smæðar í íslensku samfélagi og öflugu leitarstarfi.