Fara yfir grundvallaratriði og meta stöðuna

„Við erum að fara yfir grundvallaratriði í þessum málum og ræða saman," segir Sverrir Björn Björnsson formaður Landssambands slökkviliðs- og sjúkraflutningamanna. Um 70 félagsmenn hittust í Húnabúð í Skeifunni klukkan níu í morgun til að fara yfir stöðuna í samningaviðræðum en þriðja verkfall þeirra hófst klukkan átta í morgun og lýkur á miðnætti.

Á fundinum eru slökkviliðs- og sjúkraflutningamenn frá Keflavíkurflugvelli, Reykjavíkurflugvelli og höfuðborgarsvæðinu. Þá er fundurinn tengdur við Reykjanesbæ, Fjarðarbyggð og Akureyri. „Við erum að fara yfir það hvernig þetta gekk í nótt og meta stöðuna," segir Sverrir Björn en samningaviðræður stóðu til sex í morgun. Sverrir var svo mættur á fundinn klukkan níu og segist hafa fengið lítinn svefn. „Ég er búinn að sofa einhverjar tuttugu til fjörutíu mínútur, ég geri mér ekki grein fyrir því sjálfur."

Samningaviðræður í nótt stoppuðu á atriði sem er tæknilegs eðlis. Sverrir Björn vill ekki gefa upp hvaða atriði það er. „Það er atriði sem við eigum og er geymt í húsakynnum ríkissáttasemjara. Í svona kjarasamningum snýst þetta um mörg lítil atriði, þegar þau koma öll saman þá ná menn samningnum."

Og hann er bjartsýnn á að félagsmenn komi sterkari út af fundinum. „Menn koma alltaf sterkari út af svona fundum þegar þeir koma saman. Þetta er stór og góður fundur," segir hann.