Sextíu þúsund nýir fermetrar í fyrra

Verslunarhúsnæði á höfuðborgarsvæðinu stækkaði um tæpa sextíu þúsund fermetra frá árinu 2008 til 2009, sem jafngildir 7,9 prósenta stækkun. Þetta kemur fram í nýútkominni Árbók verslunarinnar.

Heildarfermetrafjöldinn á höfuðborgarsvæðinu var 816.408 fermetrar í fyrra. Því voru fjórir fermetrar af verslunarhúsnæði fyrir hvern íbúa svæðisins. Meðalverðið á fermetrann var rúmar 212 þúsund krónur.

Á landinu öllu voru 1.157.922 fermetrar verslunarhúsnæðis í lok síðasta árs, sem var 6,6 prósenta aukning frá árinu 2008. Meðalverðið á fermetra utan höfuðborgarsvæðisins var rúmar 70 þúsund krónur.

Verslunarrými hefur aukist mun hraðar á höfuðborgarsvæðinu en annars staðar undanfarin ár. Frá árinu 1999 til ársins 2009 jókst rými á höfuðborgarsvæðinu um 78,3 prósent. Á öllu landinu hefur það aukist um 71,8 prósent á þessum áratug.

Þá er töluvert um óklárað verslunarhúsnæði, sem ekki er búist við að klárist og fari í notkun á næstunni. Á síðasta ári var 120 þúsund fermetra verslunarrými ýmist skráð í byggingu eða með byggingaleyfi. - þeb