Vildu frystar milljónir til baka vegna áfellisdóms

Eigendur félagsins Vindasúlna ehf., sem var í eigu feðganna Arons og Karls Steingrímssonar sem gjarnan er kenndur við Pelsinn, vildu hnekkja úrskurði Héraðsdóms Reykjavíkur sem heimilaði embætti ríkislögreglustjóra að leggja hald á tæplega 93 milljónir vegna meints fjársvikamáls varðandi nýtt húsnæði kínverska sendiráðsins.

Hæstiréttur staðfesti úrskurð héraðsdóms í dag. Feðgarnir vildu meina að haldlagning fjármunanna væri ógilt á þeim grunni að ríkislögreglustjóri hafi brotið hlutlægnireglu sakamálalaga með orðalagi sínu í bréfi til MP banka, þar sem féð var geymt.

Í upphafsorðum bréfsins sagði að efnahagsbrotadeild ríkislögreglustjóra væri að rannsaka stórfelld fjársvik í tengslum við sóknaraðila. Í setninguna vantaði orðin „meint" eða „hugsanleg" fjársvik að mati feðganna.

Málið snýst um hús, sem er við Skúlagötu 51, og var í eigu Vindasúlna ehf, sem er í eigu þeirra feðga. 2. desember var gert tilboð í húsið. Húsið var aftur á móti flutt út úr Vindasúlum þann 11. desember og inn í eignarhaldsfélagið 2007.

Þremur dögum síðar gerði sami aðili annað tilboð í húsið upp á 575 milljónir króna. Þann 16. desember féllust bankarnir á tilboðið en degi síðar seldu eigendurnir húsið til kínverska sendiráðsins fyrir 870 milljónir króna.

Arion banki, Glitnir og Íslandsbanki, töldu að með þessum gjörningi hafi feðgarnir haft af þeim allt að 300 milljónir króna og fóru fram á lögreglurannsókn. Efnahagsbrotadeild Ríkislögreglustjóra framkvæmdi í kjölfarið húsleitir á þremur stöðum; starfsstöð feðganna og hjá tveimur öðrum mönnum sem sáu um viðskiptin.

Málið er enn í rannsókn.