Bjargvætturinn á metsölulista

Bókin Bjargvætturinn í grasinu eftir hinn sáluga J.D. Salinger er í öðru sæti á kiljulista Eymundsson. Salinger lést 27. janúar síðastliðinn og síðan þá hefur áhugi á verkum hans aukist mikið.

„Þó að leitt sé að hann hafi dáið er voða gaman að athyglin skuli aftur færast á þessa bók því hún er í stórgóðri þýðingu Flosa Ólafssonar og leitt að hann skuli ekki sjá nafn sitt aftur á mestölulista sem þýðandi,“ segir Bryndís Loftsdóttir hjá Eymundsson. Síðan Salingar lést hefur bókin selst í fleiri eintökum í versluninni en allt síðasta ár, sem segir nokkuð um hinn aukna áhuga hér á landi. „Þetta er bók sem er frábær og hún flokkast undir klassík. Þetta er ein af þessum bókum sem kemur vel út úr þýðingu og því ber að þakka Flosa.“

Bjargvætturinn í grasinu kom fyrst út hjá AB-forlaginu árið 1975 í þýðingu Flosa og aftur árið 1982. Þriðja útgáfan kom síðan út 2005 á vegum Skruddu. Ívar Gissurarson hjá Skruddu segir að bókin hafi selst ágætlega í gegnum árin. „Þetta er bók sem rjátlast alltaf út enda „klassíker“ sem flestir þurfa að lesa, ekki síst ungt fólk. Tíðarandinn í henni er algjörlega tímalaus.“

Skrudda ætlaði upphaflega að gefa bókina út með mynd á kápunni en Salinger tók fyrir það. „Salinger var á móti öllum myndum því það mátti ekkert trufla innihaldið,“ segir Ívar. Þá höfðu þegar verið prentaðar um 500 kiljur og var þeim öllum fargað að ósk hins sérvitra Salinger. „Sem betur fer var þetta kilja en ekki harðspjalda bók, þannig að þetta fór ekki illa með okkur fjárhagslega.“ -fb