Fylgi Vinstri grænna hríðfellur

Samfylkingin og Sjálfstæðisflokkurinn bæta við sig fylgi en fylgi Vinstri grænna lækkar samkvæmt nýjum þjóðarpúlsi Gallup. Stuðningur við ríkisstjórnina hefur ekki mælst minni frá því Samfylking og Vinstri græn tóku við stjórnartaumunum.

RÚV greindi frá niðurstöðum þjóðarpúls Gallup í júlí í fréttum í gær.

Fylgi Sjálfstæðisflokksins hefur aukist um tvö prósentustig og er nú þrjátíu og fimm prósent. Hefur fylgi flokksins ekki mælst meira síðan fyrir bankahrun.

Samfylkingin bætir einnig við sig og mælist nú með tuttugu og fjögurra prósenta fylgi en flokkurinn hefur ekki mælst með meira fylgi síðan í byrjun þessa árs. Fylgi Vinstri grænna lækkar hins vegar, en flokkurinn mælist með nítján prósenta fylgi í júlí. Í þjóðarpúls Gallup fyrir maí sögðust tuttugu og sjö prósent styðja flokkinn og hefur hann því tapað átta prósentustigum á tveggja mánaða tímabili.

Fylgi Framsóknarflokksins mælist nú 12 prósent líkt og í júní. Hreyfingin er með sex prósenta fylgi en sex prósent segjast myndu stuðja aðra flokka ef kosið væri nú.

Stuðningur við ríkisstjórnina minnkar milli mánaða og segjast fjörutíu prósent styðja hana nú. Í byrjun ársins mældist stuðningurinn fimmtíu prósent, samkvæmt frétt RÚV.