Afþreyingin víkur fyrir Óskarsvænni dramatík

Afþreyingarmyndir sumarsins sem hafa tröllriðið kvikmyndahúsum eru að hverfa á braut og eins og venjan er fylla alvarlegri og Óskarsvænni myndir þeirra skörð.

Kvikmyndir sem margar þykja líklegar til Óskarsverðlaunanna verða frumsýndar í Bandaríkjunum á næstu vikum og mánuðum. Dramatíkin og alvaran er þar í fyrirrúmi eins og svo oft áður á þessum árstíma.

Fréttablaðið tók saman lista yfir nokkrar af þeim myndum sem hafa mest verið í umræðunni að undanförnu og þykja vænlegar til árangurs.

Wall Street: Money Never Sleeps

Oliver Stone snýr aftur með framhald hinnar vinsælu Wall Street frá árinu 1987. Michael Douglas er enn í hlutverki fjármálamógúlsins Gordons Gekko, en hann hlaut einmitt Óskarinn fyrir hlutverkið á sínum tíma. Shia Lebouf kemur í stað Charlie Sheen sem lærisveinn Gekko. Myndin er væntanleg í lok mánaðarins.

Sýnishorn úr Wall Street 2.

The Social Network

David Fincher, maðurinn á bak við The Curious Case of Benjamin Button og Fight Club, sendir frá sér The Social Network í október. Hún fjallar um Mark Zuckerberg, stofnanda Facebook-síðunnar. Jesse Eisenberg sem sló í gegn í Zombieland leikur aðalhlutverkið.

Sýnishorn úr Social Network.

Hereafter

Clint Eastwood leikstýrir þessari dramatísku mynd sem fjallar um þrjár manneskjur og tengsl þeirra við dauðann. Matt Damon leikur aðalhlutverkið og framleiðandi er Steven Spielberg. Handritshöfundur er Peter Morgan sem á að baki The Queen og Frost/Nixon. Frumsýning vestanhafs í lok október.

Sýnishorn úr Hereafter.

127 Hours

Leikstjóri er Danny Boyle, sem síðast sendi frá sér verðlaunamyndina Slumdog Millionaire. Ræman er byggð á sannsögulegum atburðum sem áttu sér stað árið 2003 þegar bandarískur fjallaklifrari festi hönd sína í gljúfri með hræðilegum afleiðingum. Væntanleg í nóvember.

Sýnishorn úr 127 Hours.

The Fighter

Myndin kemur út í byrjun desember og er byggð á ævi hnefaleikakappans „Irish" Micky Ward, sem Mark Wahlberg leikur. Christian Bale túlkar bróður Wards sem þjálfaði hann áður en hann varð atvinnumaður um miðjan níunda áratuginn.

Blue Valentine



Ryan Gosling og Michelle Williams leika hjón sem þurfa að glíma við ýmis vandamál. Myndin var sýnd á Sundance-kvikmyndahátíðinni við góðar undirtektir og verður tekin til almennra sýninga á annan í jólum. Hljómsveitin Grizzly Bear samdi alla tónlistina í myndinni.

Sýnishorn úr Blue Valentine.

The Tree of Life



Terence Malick (The Thin Red Line) var í fimm ár að ljúka við þessa mynd. Sean Penn leikur miðaldra föður sem rifjar upp æsku sína. Brad Pitt er einnig í leikaraliðinu. Væntanleg á annan í jólum vestanhafs.

Sýnishorn úr Tree of Life.

True Grit

Enn ein myndin frá Coen-bræðrum. Þessi fjallar um harðsvíraðan lögreglumann sem hjálpar þrjóskri konu að hafa uppi á morðingja föður hennar, Jeff Bridges, Matt Damon og Josh Brolin eru í helstu hlutverkum. Frumsýnd á annan í jólum.