Sakar Íslending á Spáni um ofsóknir og líflátshótanir

Starfsmaður fyrirtækisins Costablanca.is segist hafa verið ofsóttur af Íslendingi á Alicante á Spáni. Hann hefur kært manneskjuna til lögreglunnar á Spáni og talað við utanríkisþjónustuna. Í tilkynningu á vef fyrirtækisins er manneskjan nafngreind og sögð vera geðsjúk.

„Þessi geðsjúki einstaklingur hefur jafnframt setið um heimili folks á Spáni og haldið uppi fölskum asökunum í garð Íslendinga búsetta a Spáni m.a. um nauðgun, morð og önnur ólögleg athæfi. Dæmi eru um ítrekaðar líflátshótanir gagnvart tilteknum Íslendingum a Spáni sem reyndar var fylgt eftir fyrir nokkru með barsmíðum fyrir utan heimili eins Íslendings," segir orðrétt í tilkynningunni á Costablanca.is en fyrirtækið sér um þjónustu við Íslendinga búsetta á Torrevieja-svæðinu.

Þar segir janframt að haft hafi verið samband við yfirvöld á Íslandi og fjölskyldu manneskjunnar. Þá er Íslendingurinn, sem er kona á fertugsaldri, nafngreindur og sagt hvar á Spáni hún búi.

Henti hundaskít í húsið mitt

Vísir ræddi við starfsmann Costablanca.is sem heitir Bjarni Sigurðsson og er lögfræðingur. Bjarni var áður starfsmaður fasteignasölunnar Holts og var árið 2004 dæmdur í þriggja og hálfs árs fangelsi fyrir fjárdrátt, skjalafals og fjársvik. Svikin voru sögð nema um 160 milljónum króna. Hann er nú staddur á Íslandi, að eigin sögn til að létta undan álagi en hinar meintu ofsóknir hafa staðið yfir í um tvö ár.

„Þetta hófst á því að hún var viðskiptamaður fyrirtækisins og leigði íbúð í gegnum okkur. Síðar fóru samskiptin að taka á sig aðra mynd, hún bað mig til dæmis einu sinni að kíkja í heimsókn til sín og taka upp klámmynd með sér og fá aðra starfsmenn til að vera með. Á endanum tók ég hana á eintal og sagði að þetta væri of langt gengið. Þá byrjaði alls kyns áreiti í bloggheimum, hún hefur stofnað bloggsíður undir fölskum nöfnum og hvarvetna er lokað á hana," segir Bjarni.

Vísir staðfesti að manneskjan hefur bloggað undir eigin nafni á bloggvef Morgunblaðsins en þeim síðum hefur verið lokað.

„Hún er bara rosalega veik og ég er búinn að gera allt sem ég get gert. Ég talaði við foreldra hennar og utanríkisráðuneytið en ástandið síðustu mánuði hefur verið skelfilegt. Hún hefur setið um heimili okkar, hent hundaskít í húsið og verið með líflátshótanir. Hún hefur haldið því fram að ég og konan mín værum að reka hóruhús og sprauta óléttar konur með heróíni. Þetta er þvílíkur viðbjóður," segir Bjarni.

Íslendingar varaðir við

Í tilkynningunni á vef Costablanca.is eru Íslendingar á Torrevieja-svæðinu varaðir við konunni. Bjarni segir að flestir þeir Íslendingar sem búi á svæðinu viti af henni en ástandið hafi verið orðið svo slæmt að fyrirtækið hafi ákveðið að vara opinberlega við henni.

„Við ákváðum að setja þetta inn. Þetta er bara víti til varnaðar," segir Bjarni og tekur fram að lögreglan á Spáni líti málið alvarlegum augum. „Þeir eru með þetta undir eftirliti og ef einhver beinn atburður á sér stað eigum við að hringja strax inn."

Lygar og rógburður

Vísir ræddi við konuna sem Bjarni ásakar opinberlega um ofsóknir og að vera andlega vanheil. Hún sagði ásakanir Bjarna úr lausu lofti gripnar.

„Ég mun ekki svara honum opinberlega heldur ræða málið við lögfræðinga mína," sagði konan. „Honum verður stefnt vegna þessara ummæla."