Reykjanesfólkvangur að verða ruslahaugur - myndir

Bílhræ, tóm skothylki og hálfbrunnar rúmdýnur liggja eins og hráviði í Reykjanesfólkvangi. Göngugarpi ofbauð umgengnin og tók myndir af ruslinu. Starfsmanni Reykjanesfólkvangs blöskrar hvernig fólk kemur fram við náttúruna. Hann ætlar að loka afleggjaranum að námunni þar sem fólk hendir ruslinu og segir standa til að fjarlægja bílhræin og hreinsa svæðið á næstu vikum.

„Þetta er þvílíkur viðbjóður. Ég hef ekki séð annað eins á öllum mínum gönguferðum," segir Ragnar Áki Jónsson, 78 ára göngugarpur, sem brá heldur betur í brún þegar hann fór í göngutúr skammt frá Krýsuvík á dögunum.

Ragnar gekk eftir Stórhöfðastíg í grennd við malarnámurnar sem er við veginn áður en komið er að Kleyfarvatni og Breiðdal. Afleggjari hjá malarnámunum liggur að námu sem ekki er lengur vinnsla í. Fólk virðist hins vegar hafa ákveðið að breyta námunni í ruslahaug - ruslið er einfaldlega út um allt.

„Þarna eru þvottavélar og eldavélahellur. Menn keyra bara þarna og henda drasli út. Ég er nú 78 ára gamall og hef farið víða en ég hef aldrei séð neitt líkt þessu," segir Ragnar sem tók myndavélina með sér og skrásetti umgengnina til að vekja fólk til umhugsunar um það sem þarna á sér stað.

Vísir ræddi við Hermann Magnús Sigurðsson, starfsmann Reykjanesfólkvangs. Hermann sagðist meðvitaður um vandamálið á þessu svæði.

„Það er nú ekki bara þarna. Því miður. Það eru bílhræ sem hafa verið skilin eftir í Breiðdalnum og svo virðast menn nota svæðið til að æfa skotfimi, menn stilla upp brúsum og flöskum út um allt hraunið og skilja svo allt eftir, skothylkin og ruslið. Það er eins og menn beri enga virðingu fyrir umhverfinu," segir Hermann.

Hermann segist ákveðinn að loka afleggjaranum að námunni þar sem mestu rusli hefur verið hent. Hann segir jafnframt það standa til að hreinsa upp svæðið í samstarfi við sumarátak Umhverfisstofnunar. Sú vinna hafi átt að hefjast í síðustu viku en það ekki tekist. Því verði hafist handa í næstu viku, farið með kranabíl og hreinsunarhóp og svæðið hreinsað upp.

„Reykjanesfólkvangur er algjör paradís en því miður er umgengnin ekki alltaf góð. Við settum til dæmis upp skúr fyrir klósett og grill í Krókamýri sem er í nágrenni Djúpavatns. Algjör náttúruperla. En menn komu á bílum, bökkuðu á skúrinn og skutu grillið í tætlur."

Hermann segir bara vitleysinga sem haga sér á þennan hátt - fólk sem beri enga virðingu fyrir umhverfi sínu.

Brynhildur Magnúsdóttir, umsjónarmaður sumarátaks Umhverfisstofnunar, staðfesti að hópur á þeirra vegum færi í næstu viku að hreinsa svæðið í nágrenni við Vatnskarðsnámur. „Þetta átak hefur verið í gangi í sumar. Við förum á friðlýst svæði og gerum það sem þarf að gera."

Og miðað við myndir Ragnars Áka og frásögn Hermanns verður nóg að gera hjá hreinsunarhópnum - sem líklega þarf kranabíl og vinnuvélar til að koma ruslinu af þessu friðlýsta svæði burt.