Bæjarstjóri Kópavogs: Líf að færast í framkvæmdir

Yfir 500 íbúðir stóðu hálfkláraðar eða tómar í Kópavogi undir lok síðasta árs. Bæjarstjóri Kópavogs segir ástandið miður, en sem betur fer telji hún að líf sé að færast í framkvæmdir að nýju.

Fréttastofa fjallaði um ný hverfi sem hafa farið illa út úr kreppunni í fréttum 26. júní síðastliðinn. Í hverfunum hafa framkvæmdir víða stöðvast alveg eftir að bankakerfið hrundi og tóm og hálfkláruð glæsihýsi eru ekki óalgeng sjón, eins og íbúar í efri byggðum Kópavogs hafa fengið að kynnast. Þar dreymir íbúana um að einhver flytji inn í húsin og aukið líf færist í hverfið.

Fylgjast náið með framkvæmdum

Bæjaryfirvöld í Kópavogi hafa fylgst náið með framkvæmdum við húsin síðan kreppan skall á, en gerð var úttekt á umfangi þessara bygginga undir lok síðasta árs. Þá höfðu aðeins burðarvirki 65 íbúða verið reist, 159 íbúðir voru fokheldar og 155 voru tilbúnar undir innréttingar. 62 íbúðir voru ófullgerðar en í notkun, en 95 íbúðir voru fullbúnar en stóðu auðar. Meirihluti íbúðanna stendur í fjölbýli, en líklegt má telja að ástandið sé svipað í nýjum byggðum annarsstaðar.

Segir bankana vera að taka við sér

Guðrún Pálsdóttir, bæjarstjóri Kópavogs, segir að sveitarfélagið hafi brugðist við með því að leysa til sín lóðir þar sem framkvæmdir hafi ekki verið hafnar, eða frágangur valdið hættu, og gert bragarbót á. Hins vegar geti bæjarfélagið lítið gert ef framkvæmdir eru hafnar og eigendur eru að húsunum. Sveitarfélagið hafi reynt að vera liðlegt við eigendurna, og hafi til að mynda ekki beitt dagsektum á einstaklinga nema í undantekningatilvikum.

„Auðvitað finnst okkur þetta miður. Sérstaklega gagnvart íbúunum sem eru þarna í nágrenninu en sem betur höfum við orðið þess vör að núna er að lifna yfir aftur. Það er eins og bankarnir séu að taka við sér," segir Guðrún.