Rýr svör um kostnað við umsókn að ESB

Hversu mikil vinna hefur farið fram í ráðuneytum og ríkisstofnunum við aðildarumsókn að Evrópusambandinu?

Augljóst er af svörum allra ráðuneyta við fyrirspurn á Alþingi að mikil vinna hefur þegar verið unnin í ráðuneytum og hinum ýmsu ríkisstofnunum við umsókn Íslands um aðild að Evrópusambandinu. Þrátt fyrir ósk um upplýsingar um kostnað ráðuneytanna leggur ekkert þeirra mat á kostnað sinn við vinnuna.

Gunnar Bragi Sveinsson, þingmaður Framsóknarflokksins, lagði fyrirspurn fyrir alla tólf ráðherrana í ríkisstjórninni um vinnu við umsóknina. Þar var spurt að því hversu margir starfsmenn ráðuneyta og undirstofnana hafi unnið að umsókninni, og hversu hátt hlutfall það sé af starfsmannafjölda. Þá er spurt hversu miklu fé ráðuneytin og stofnanir muni verja vegna þessarar vinnu.

Hafi Gunnar Bragi vonast til þess að svörin yrðu skýr, og úr þeim hægt að lesa nákvæmar upplýsingar um vinnu starfsmanna ráðuneyta og undirstofnana, sem og kostnað við þá vinnu, er líklegt að hann hafi orðið fyrir vonbrigðum. Svörin eru sett fram á ólíkan hátt, oft gróflega áætluð, og ómögulegt að gera sér grein fyrir heildarkostnaði eða vinnuframlagi starfsmanna af lestri þeirra.

Ekkert ráðuneyti annað en utanríkisráðuneytið hefur ráðið starfsmenn í vinnu við umsóknina, og sama má segja um ríkisstofnanirnar. Í svari utanríkisráðherra kemur fram að níu starfsmenn hafi verið ráðnir til starfa hjá Þýðingarmiðstöð ráðuneytisins, og stefnt sé á að ráða fjórtán til viðbótar. Þýðendurnir sinni þó einnig öðrum málum en þýðingum vegna umsóknarinnar.

Ekkert ráðuneytanna gerir tilraun til að meta kostnað við vinnu starfsmanna sinna að umsókninni. Starfsmenn frá öllum ráðuneytum hafa þurft að vinna að umsókninni, en mjög mismikið eftir ráðuneytum.

Í svari sjávarútvegs- og landbúnaðarráðherra kemur fram að ekki sé gert ráð fyrir vinnu við umsóknina á fjárlögum, en „ljóst er að sá kostnaður verður umtalsverður“. Í svari umhverfisráðherra er bent á að þótt ekki sé gert ráð fyrir auknum fjárútlátum muni vinna við umsóknina taka tíma starfsmanna ráðuneytis og undir­stofnana þess frá annarri starfsemi.

Ekkert ráðuneytanna hefur greitt sérstaklega fyrir ráðgjöf vegna umsóknarinnar, en sum hafa greitt eða áforma að greiða um eina milljón króna hvert fyrir þýðingar á spurningum Evrópusambandsins, sem stjórnvöld þurftu að svara í umsóknarferlinu.

brjann@frettabladid.is