Hjónabandið andleg eining

Upptökustjórinn Swizz Beatz segir að það sé blessun að hafa fengið að giftast söngkonunni Aliciu Keys.

Parið gifti sig á Korsíku í Frakklandi fyrr í þessum mánuði en Alicia er barnshafandi með fyrsta barn þeirra.

Swizz vill að umheimurinn viti að það var hvorki frægð Aliciu né auðæfi hennar sem drógu hann að henni heldur djúp andleg tenging sem þau finna bæði svo sterkt fyrir.

„Ég lít ekki á hjónabandið út frá frægðarsólinni. Ég lít á samband mitt við eiginkonu mína sem andlega einingu," sagði Swizz.

„Ég hef eytt miklum tíma í heimsfrægar stjörnur allt mitt líf og frægðin gerir ekkert fyrir mig. Allt gengur þetta út á manneskjurnar."

Spurður út í tilfinningar hans til Aliciu sagði Swizz: „Ástin er öflugri en allt annað. Ég er betri maður eftir að ég kynntist Aliciu. Hún hefur þannig áhrif á mig að ég vil endalaust gefa af mér."