Hreiðar er grunaður um fleiri brot en Magnús

Hæstiréttur staðfesti í gær gæsluvarðhaldsúrskurð yfir Hreiðari Má Sigurðssyni og Magnúsi Guðmundssyni. Ástæða þess að farið var fram á lengra gæsluvarðhald yfir Hreiðari en Magnúsi er sú að Hreiðar er grunaður um fleiri brot en Magnús, samkvæmt heimildum Fréttablaðsins.

Vegna þessa taldi sérstakur saksóknari sig þurfa lengri tíma til að yfirheyra þá sem tengjast meintum lögbrotum Hreiðars en Magnúsar. Hreiðar var á föstudag úrskurðaður í tólf daga gæsluvarðhald og Magnús í sjö daga. Báðir kærðu úrskurðinn til Hæstaréttar, sem hefur nú staðfest úrskurðinn. Sérstakur saksóknari fór fram á að niðurstöður Hæstaréttar yrðu ekki birtar á vef dómsins vegna rannsóknarhagsmuna, og var fallist á það.

Embætti sérstaks saksóknara hefur yfirheyrt nokkra sakborninga og vitni sem tengjast málum tvímenninganna undanfarna daga, meðal annars menn sem voru eða eru í forsvari fyrir þau félög sem áttu í hinum vafasömu viðskiptum við Kaupþing í aðdraganda bankahrunsins.

Til stendur að yfirheyra Sigurð Einarsson, fyrrverandi stjórnarformann Kaupþings, en samkvæmt heimildum hefur sérstakur saksóknari enga vitneskju um hvenær hann er væntanlegur til landsins. Hann var upphaflega boðaður til yfirheyrslu á föstudaginn kemur en síðan var farið fram á að henni yrði flýtt. Samkvæmt frétt Stöðvar 2 í gær hyggst hann ekki flýta för sinni hingað til lands, en býður sérstökum saksóknara að yfirheyra sig í London, þar sem hann er búsettur.

Þá stendur einnig til að yfirheyra Ingólf Helgason, fyrrverandi forstjóra Kaupþings á Íslandi, og Steingrím P. Kárason, fyrrverandi yfirmann áhættustýringar bankans. - sh, bj