Formaður telur stöðuna óbreytta

Unnur G. Kristjánsdóttir, formaður þingkjörinnar nefndar um erlenda fjárfestingu, segist ekki telja, í fljótu bragði, að nefndin þurfi að fjalla á ný um viðskipti Magma Energy og Geysi Green Energy með hlutabréf í HS Orku en Magma hefur eignast 98,53 prósent í GGE.

Unnur segir að nefndin hafi áður samþykkt kaup Magma á minnihluta bréfa og sér ekki að neitt hafi breyst sem kalli á nýja umfjöllun. Þetta þurfi þó að kanna. Enginn nefndarmaður hefur óskað eftir fundi um málið.

Atli Gíslason, þingmaður VG í Suðurkjördæmi, telur að kalla eigi nefndina saman og fjalla um viðskiptin. Forsendur séu breyttar. Ný viðskipti hafi verið gerð og þess vegna þurfi að afla nýrra gagna og kveða upp nýjan úrskurð í nefndinni. Þingflokkur VG hefur sent ríkisstjórninni áskorun um að undið verði ofan af einkavæðingu HS Orku. Atli segist vona að það verði hægt, en brugðið geti til beggja vona.

Unnur G. Kristjánsdóttir segist alltaf hafa átt von á að Magma vildi kaupa allt hlutafé í GGE. Yfirlýsingar forsvarsmanna Magma hafi strax bent til þess. - pg