Búist við blíðviðri um helgina

Gert er ráð fyrir áframhaldandi blíðviðri á landinu í dag og á stærstum hluta landsins um helgina. Hlýjast verður á suð­vesturhorni landsins.

Gert er ráð fyrir góðu veðri á nánast öllu landinu í dag og meiri hita en í gær. Hæstur verður hitinn um 20 stig á Kirkjubæjarklaustri um miðjan dag, samkvæmt upplýsingum frá Veður­stofu Íslands.

Á morgun er gert ráð fyrir því að hitinn verði á bilinu tíu til tuttugu stig og hlýjast verði á Suðvesturlandi. Léttskýjað verður víða um land en dálítil væta á Norðausturlandi. Vindur verður um þrír til átta metrar á sekúndu.

Á sunnudag kólnar heldur í veðri og líkur eru á skúrum seinni part dagsins inn til landsins. Áfram verður hlýjast á Kirkjubæjarklaustri og rigning á Norðausturlandi en annars staðar verður léttskýjað eða bjartviðri.