Hlífir sér við gjörningastússi

Fyrirsæta Ragnars Kjartanssonar á Feneyjatvíæringnum - „Sundskýlumaðurinn frá Feneyjum" - var listamaðurinn Páll Haukur Björnsson. Í dag kl. 14 er opnun sýningar hans, Grár er ekki ástand en takk fyrir afnotin af sófanum, í Listasal Mosfellsbæjar.

„Það var ekkert nema tími í Feneyjum enda fólst ekkert í starfinu nema að hugsa," segir Páll um Feneyjadvölina. „Skissubókin fitnaði því vel á þessum sex mánuðum og þessi sýning er afraksturinn. Ég er vanur að vera í gjörningastússi en vildi hlífa mér við því í þetta skiptið. Ég er að sýna skúlptúra og teikningar, bara svolítið beisik stöff. Teikningarnar eru abstrakt stúdíur og skissur. Þetta er hálfgerð hjáverka-sýning því þetta er efniviður sem hefur safnast saman í kringum gjörningainnsetningar sem ég hef verið að gera síðastliðin tvö ár. Mig hefur lengi langað til að sýna þetta."

Páll segist koma ferskur frá Feneyjadvölinni.

„Þetta var óttalegt heilsuhæli. Maður flaug úr brjáluðum mótmælum og kreppu og þunglyndi svo þetta var mýkjandi ferð. Til lengdar helltist þó yfir mann eirðarleysi og leiði því Feneyjar er leiðinleg borg. Það gerist ekki neitt þar. Mér finnst mjög gott að vera kominn heim. Það kom mér á óvart hvað stemningin er góð hérna. Fólk er almennt jákvætt og í stuði og tilbúið að gera eitthvað nýtt og spennandi."

Fram undan hjá Páli er að halda áfram að koma öllum hugsununum sem byggðust upp í Feneyjum til skila með sýningarhaldi. Svo er hann í stjórn Nýlistasafnsins og þar er margt á döfinni. „Við opnum nýja safnið í febrúar. Við erum flutt niður á Skúlagötu í mun stærra og flottara húsnæði en við vorum í. Það verður mjög skemmtilegt. Við erum allavega mjög spennt." drgunni@frettabladid.is