Runólfur átti ekki frumkvæði að kaupum og er sagður „fórnarlamb“

Menn sem áttu frumkvæði að því að kaupa hluti Byrs og Spron í Sparisjóðabankanum höfðu samband við Runólf Ágústsson að fyrra bragði til að bjóða honum að fjárfesta, án nokkurrar áhættu. Einn þeirra segir Runólf „fórnarlamb." Runólfur hefur ákveðið að þiggja ekki laun fyrir hálfan dag í embætti umboðsmanns skuldara.

Runólfur Ágústsson sagði í viðtali við Kastljós Rúv á þriðjudag að hann hefði ekki átt frumkvæði að fjárfestingu sinni í Sparisjóðabankanum.

Eftirgrennslan fréttastofu leiddi í ljós að þetta er rétt hjá Runólfi. Árið 2007 vildu bæði Byr sparisjóður og SPRON selja hluti sína í Sparisjóðabankinn, sem nú er í slitameðferð starfaði þá undir heitinu Icebank. Á þessum tímapunkti, hápunkti góðærisins meira en ári fyrir hrun, var fyrirtækjaráðgjöf SPRON að leita að fjárfestum til að selja hluti sína í Sparisjóðabankanum.

Sigurður Smári Gylfason, hjá Behrens fyrirtækjaráðgjöf og samstarfsmenn hans áttu frumkvæði að því að setja saman hóp fjárfesta sem bauð í hluti SPRON og Byrs, en samtals voru þetta viðskipti upp á fimmtán milljarða króna. Sigurður Smári Gylfason staðfesti í samtali við fréttastofu að hafa haft samband við Runólf Ágústsson og boðið honum að kaupa hluti í Sparisjóðabankanum, en úr varð að Runólfur fjárfesti fyrir þrjú hundruð milljónir króna í gegnum eignarhaldsfélagið Obduro. Hann fékk sem kunnugt er tvö hundruð milljónir með láni sem aðeins var tryggt með veði í bréfunum sjálfum.

Sigurður Smári sagði að haft hefði verið samband við marga einstaklinga, sem höfðu tengsl við atvinnulífið, án þess að vera í farabroddi þess, til þess að taka þátt í þessum viðskiptum. Runólfur hafi verið einn þeirra, en hann var þá framkvæmdastjóri Keilis, miðstöð vísinda, fræða og atvinnulífs í Keflavík. Sigurður Smári orðaði það þannig að Runólfur væri í raun „fórnarlamb" í málinu. Aðkoma Finns Sveinbjörnssonar, þáverandi bankastjóra Icebank, að þessum viðskiptum var lítil sem engin, samkvæmt upplýsingum fréttastofu.

Runólfur, sem gegndi embætti umboðsmanns skuldara í hálfan sólarhring, tilkynnti í dag að hann hygðist ekki þiggja laun fyrir þessar klukkustundir sem hann gegndi starfinu.