Titlar sig fyrirsætu vegna sjónvarpsmannsins Egils

„Það var alltaf verið að angra mig. Eftir hrunið þá var hringt í mig nánast tíu sinnum á dag. Fólk var að leita að Agli Helgasyni, alveg kolgeggjað,“ segir Egill Kári Helgason, nafni sjónvarpsmannsins þekkta og sonar hans Kára.

Vegna áreitisins þurfti Egill Kári að setja starfsheitið módel aftan við nafnið sitt í símaskránni til að fæla æstan almúgann frá. „Ég hringdi í símaskrána og bað um að titla mig eitthvað sem tengdist Agli Helgasyni ekki neitt. Mér datt þetta nú í hug sjálfur en þær aðstoðuðu mig með þetta.“

Að sögn Egils Kára var áreitið sem hann varð fyrir af ýmsum toga. „Það var ein kelling sem ætlaði að taka kallinn í gegn af því að hann hafði skrifað um pabba hennar á einhverju bloggi. Svo var bara allur andskotinn. Eftir að ég var búinn að útskýra að ég væri ekki Egill Helgason sjónvarpsmaður spurði fólk hvort ég vissi hvert númerið hans væri og hvort ég þekkti konuna hans, nefndu það bara. „Það er ótrúlegt hvað fólk var duglegt að spjalla við mann eftir á.“

Þrátt fyrir fyrirsætutitilinn segist Egill Kári, sem starfar hjá sjávarútvegsfyrirtækinu Ísfelli, aldrei hafa fengið boð um að sitja fyrir. „Ég er eiginlega búinn að vera að bíða eftir því. Það er greinilega kreppa hjá módelum á Íslandi,“ segir hann og hlær.

En hvað finnst honum um nafna sinn á RÚV? „Hann er bara fínasti kall og stendur sig ágætlega, held ég bara, við að fjalla um allt þetta rugl sem er í gangi.“

Sjónvarpsmaðurinn Egill skilur vel það sem Egill Kári hefur gengið í gegnum og finnst ekkert undarlegt að hann skuli hafa breytt starfsheiti sínu. „Hann á alla mína samúð að vera tengdur við þennan mann sem allir vilja vera að kvabba eitthvað í og skamma. Síðan heitir sonur minn Kári þannig að kannski hefur þetta eitthvað grautast til hjá fólki. En þetta eru falleg nöfn bæði tvö,“ segir Egill og bætir við:

„Ég heiti reyndar Egill Óskar Helgason, það er hið mikla leyndarmál. En ég nota það ekki lengur. Þegar ég var yngri og aðeins tilgerðarlegri og var í menntaskóla þá kallaði ég mig Egil Ó. Helgason. Nú heiti ég bara Egill Helgason en í þjóðskrá er ég Egill Óskar Helgason.“

freyr@frettabladid.is