Skiptar skoðanir um framtíð biskups

Skiptar skoðanir eru um það á meðal presta Þjóðkirkjunnar hvort Karl Sigurbjörnsson biskup Íslands eigi að segja af sér embætti, víkja tímabundið á meðan að sannleiksnefnd um mál ÓIafs Skúlasonar fyrrverandi biskups er að störfum, eða sitja sem fastast. Þetta segja þeir prestar sem Vísir hefur rætt við í dag.

Um það bil 40 prestar í Prestafélagi Suðvesturlands, sem er deild innan Prestafélags Íslands, komu saman í dag til þess að ræða málefni líðandi stundar. Eðlilega var biskupsmálið svokallaða áberandi á fundinum. „Við ætlum að læra af því sem ekki hefur gengið nógu vel svo við getum betur mætt fólki í framtíðinni. Það er ósk okkar flestra," segir Sigfús Kristjánsson, starfandi sóknarprestur í Hjallasókn og formaður félagsins. Hann segir að menn geti haft misjafnar skoðanir á biskupnum og tengdum málum en það hafi ekki verið aðalmálið á þessum fundi.

Forsætisnefnd Kirkjuþings, undir forystu Péturs Kr. Hafstein fyrrverandi hæstaréttardómara, undirbýr nú stofnun sannleiksnefndarinnar. Hún verður að öllum líkindum skipuð á næsta Kirkjuþingi.