Óttaðist um önnur vatnsréttindi

Ísland sat hjá þegar Allsherjarþing Sameinuðu þjóðanna samþykkti í gærkvöld að aðgangur að hreinu vatni skyldi teljast til mannréttinda. Utanríkisráðuneytið óttast að þetta grafi undan öðru samkomulagi um vantsréttindi. Þingmaður vill að fulltrúi Íslands hjá Sameinuðu Þjóðunum og utanríksimálaráðherra skýri málið.

Hátt í níu hundruð milljónir manna hafa ekki aðgang að hreinu drykkjarvatni og tveir komma sex milljarðar manna búa við enga eða óviðundandi hreinlætisaðstöðu, það er nálægt helmingi jarðarbúa. Þá hefur komið fram að ein og hálf milljón barna deyr fyrir fimm ára afmælið á hverju ári, vegna þessa. Fleiri börn falla í valinn af þessum sökum en deyja samanlagt úr Alnæmi, malaríu og mislingum, sagði fulltrúi Bólivíu.

122 ríki samþykktu á Allsherjarþingi sameinuðu þjóðanna í gær tillögu um að aðgangur að hreinu vatni verði talinn til mannréttinda. Enginn greiddi atkvæði gegn tillögunni, en fjörutíu og eitt ríki sat hjá. Ísland var í þessum hópi og raunar Danir og Svíar einnig.

Fréttastofan innti utanríkisráðuneytið um skýringar á þessu. Í svari ráðuneytisins segir að Ísland, hafi ásamt sextán ríkjum Evrópusambandsins ákveðið að sitja hjá þar sem tillagan sem samþykkt var, geti grafið undan samkomulagi um vatnsréttindi sem Mannréttindaráð Sameinuðu þjóðanna vinni nú að. Þessi tillaga eigi þess vegna heima hjá Mannréttindaráðinu.

Fulltrúar Norðmanna og Finna, auk raunar stórra Evrópusambandsríkja eins og Þýskalands, Frakklands og Ítalíu, greiddu hins vegar atkvæði með ályktuninni og virðast því ljóslega telja að þessi tillaga standi öðrum ekki fyrir þrifum.

Birgitta Jónsdóttir, þingmaður hreyfingarinnar, vill að fastafulltrúi íslands hjá Sameinuðu þjóðunum og utanríkisráðherra, komi fyrir utanríkismálanefnd og skýri málið.