Aðstoðarmaður Árna Páls: Engin leiðindi

„Við erum að klára þetta bara núna, viðkomandi á að mæta klukkan níu í fyrramálið," segir Anna Sigrún Baldursdóttir, aðstoðarmaður Árna Páls Árnasonar félagsmálaráðherra. Nú vinna Árni Páll og Anna Sigrún að því að finna tímabundinn staðgengil í starf umboðsmann skuldara. En eins og kunnugt er hætti Runólfur Ágústsson í kvöld sem umboðsmaður.

Anna Sigrún segir að það komi staðgengill tímabundið í starfið á meðan kannað verður hvað það þýði þegar að menn segja af sér eins og Runólfur gerði í kvöld. „Eigum við að auglýsa stöðuna aftur eða eigum við að bjóða þeim sem voru hæfir stöðuna? Við þurfum smá tíma til þess að kanna það, við viljum lágmarka óvissuna."

En var Árni Páll ekki búinn að skoða þann möguleika ef til þess kæmi að Runólfur myndi hætta, nú hefur verið mikil gagnrýni á ráðninguna í fjölmiðlum eftir að DV greindi frá skuldastöðu hans? „Ég get ekki tjáð mig um það eins og staðan er núna."

Hefur Árni eitthvað talað við hann? „Nú veit ég það ekki, ég talaði við hann og það var allt í góðu." Engin leiðindi? „Það myndi ég nú ekki segja, þetta er ekkert auðvelt, en leiðindi eru það nú ekki. Nema að því leytinu til að það er ekki auðvelt að segja embætti sínu lausu."

Anna Sigrún segir að sá sem mun taka tímabundna starfið að sér sé ekki einhver út í bæ. „Ég get sagt þér það að þetta eru embættismenn sem þekkja embættið. Við erum að tala við þá núna. Ég geri ráð fyrir því að þetta verði einhver úr ráðuneytunum sem hefur þekkingu á þessu sviði."