Breytingar á ferðum vegna gleðigöngunnar

Talsverðar breytingar verða á akstri Strætó laugardaginn 7. ágúst vegna gleðigöngu Hinsegin daga og hátíðahalda í miðborginni. Gleðigangan hefst við Hlemm og endar með hátíðahöldum við Arnarhól og því þarf að breyta akstursleiðum og loka nokkrum stoppistöðvum á meðan á hátíðahöldunum stendur.

Alls breytist akstur á ellefu akstursleiðum. Leiðir 15, 16, 18 og 19 breytast á tímabilinu 12:00 til 15:00, leiðir 1, 3, 6, 11, 12 og 13 breytast á tímabilinu 14:00 til 18:00 og leið 14 ekur breytta leið frá kl. 06:00 til 20:00 vegna lokunar á Lækjargötu milli Geirsgötu og Hverfisgötu. Að öðru leyti verður akstur samkvæmt hefðbundinni laugardagsáætlun. Ítarlegar upplýsingar um breytingar á akstri strætó má finna á vefnum www.strætó.is.

Vakin skal athygli á að flestir vagnar munu stoppa við Hlemm allan daginn þótt aðkoma þeirra að Hlemmi verði ekki með hefðbundnu sniði í sumum tilvikum. Jafnframt er gott fyrir farþega að hafa í huga að biðstöðin í Vonarstræti, næsta biðstöð við Lækjargötu, verður í notkun allan daginn og nýtist því þeim sem annars hefðu notað biðstöðina í Lækjargötu. Allar óvirkar biðstöðvar verða merktar og vísað á næstu virku biðstöð.

Búist er við miklum fjölda í miðborginni á meðan á hátíðahöldunum stendur og því hvetur Strætó bs. sem flesta til að nýta sér almenningssamgöngur til að komast til og frá svæðinu og þannig draga úr umferðarálagi. Um leið eru farþegar hvattir til að kynna sér áætlanir Strætó og upplýsingar um breytingar á vefnum www.strætó.is.