Árni neitaði að mæta fyrir rétt í eigin máli

Árni M. Mathiesen, fyrrverandi fjármálaráðherra, var fjarstaddur þegar réttarhöld fóru fram í skaða- og miskabótamáli á hendur honum og íslenska ríkinu í Héraðsdómi Reykjavíkur í gær. Það er hæstaréttarlögmaðurinn Guðmundur Kristjánsson sem krefst fimm milljóna króna bóta vegna skipunar Árna á Þorsteini Davíðssyni sem héraðsdómara á Norðurlandi vestra í desember 2007.

Lögmaður Guðmundar, Hlöðver Kjartansson, sagði við aðalmeðferðina að Árni hefði skorast undan því að koma fyrir dóminn og gefa skýrslu og bæri að meta honum það í óhag í málinu. Karl Axelsson, lögmaður Árna, benti á móti á það að algjör óþarfi hefði verið fyrir Árna að gefa skýrslu enda lægju málavextir að fullu fyrir.

Árni var settur dómsmálaráðherra við skipunina vegna vanhæfis Björns Bjarnasonar, sem um skeið naut aðstoðar Þorsteins sem ráðherra. Árni skipaði Þorstein í embættið þrátt fyrir að sérstök matsnefnd hefði metið þrjá umsækjendur tveimur hæfisflokkum ofar, þeirra á meðal Guðmund.

Umboðsmaður Alþingis tók málið til athugunar og komst að því að annmarkar hefðu verið á nánast öllum þáttum málsins og að Árni gæti ekki fullyrt að hann hefði skipað hæfasta umsækjandann.

Þetta kallaði lögmaður Guðmundar „afbrigðilega hegðun“ og furðaði sig á því að lögmaður ríkisins skyldi vilja bera í bætafláka fyrir hana.

Guðmundur stefndi í kjölfarið Árna og ríkinu vegna ólögmætrar meingerðar gegn persónu hans og vill fyrir það fimm milljónir. Hann vill auk þess að viðurkennd verði skaðabótaskylda vegna launanna sem hann segist hafa orðið af úr því að hann fékk ekki starfið.

Deilt var um það fyrir dómi hvort Árna hafi verið heimilt að ganga gegn niðurstöðu matsnefndarinnar. Lögmenn ríkisins og Árna sögðu ráðherra að lögum hafa óskoraðan rétt til að skipa hvern þann hæfa umsækjanda sem honum sýndist. Lögmaður Guðmundar benti á móti á að reglugerðarákvæði sem segði að álit nefndarinnar væri ekki bindandi ætti sér ekki lagastoð, enda væri það andstætt vilja löggjafans.

Þá bentu lögmenn Árna og ríkisins á það að útilokað væri fyrir Guðmund að fá viðurkenndan skaðabótarétt vegna launamissis, enda væri alls óvíst hvort hann hefði fengið starfið ef Þorsteinn hefði ekki verið skipaður.

stigur@frettabladid.is