Lostavél Franks Hvam fær framtíðarheimili á Jolene

„Ég er búin að stilla vélinni upp á Jolene. En ég er auðvitað búinn að skrúfa plexigler fyrir gatið góða svo að menn séu ekki endilega að prófa hana," segir Dóra Takefusa, eigandi barsins Jolene í Kaupmannahöfn.

Hápunktur sjónvarpsþáttaraðarinnar Mér er gamanmál, sem var sýnd í haust, var tvímælalaust þegar danski grínistinn Frank Hvam leiddi þáttastjórnandann Frímann Gunnarsson út í skúr þar sem hann geymdi heimasmíðaða tottvél; Frank Hvams Blow Job maskine. Vélin var að sjálfsögðu hluti af gríni þáttarins og Hvam fékk að eiga hana þegar tökum lauk.

„Hann var með vélina á skrifstofunni sinni. Svo varð umboðskona hans ólétt og vélin fór í taugarnar á henni, þannig að hann hringdi í mig og spurði hvort ég vildi fá hana niður á Jolene," segir Dóra. Hún játar að vélin hafi vakið mikla athygli á Jolene. „Auðvitað. Það er ekki svona vél á hverjum bar. En svo það sé alveg á hreinu, þá virkar vélin að sjálfsögðu ekki. Hún var bara gerð fyrir þáttinn."

Ragnar Hansson, leikstjóri Mér er gamanmál og bróðir Gunnars Hanssonar, sem leikur Frímann Gunnarsson, er hugmyndasmiður vélarinnar. Hugmyndina fékk hann fyrir mörgum árum, en hann vissi ekki hvað hann ætti að gera við hana. „Ég hafði gengið með þessa hugmynd í maganum mjög lengi og sá fyrir mér að vélin yrði arfleifð mín," segir Ragnar. „Ég vildi að það væri tottvél á hverju götuhorni, eða allavega inni á klósettum á skemmtistöðum. Ég sá að það myndi draga úr ofbeldi og ótímabærum barneignum."

Ragnar fagnar því að vélin sé komin á framtíðarheimili í Danmörku, en hún var smíðuð þar af danska listamanninum Lauge Falkentorp. Ragnar er þakklátur Hvam fyrir að koma hugmyndinni á framfæri, enda fór hún ekki á flug fyrr en hann setti nafn sitt við hana. „Eins og með George Foreman-grillið. Hann fann það ekki upp, en strax og hann setti nafnið sitt á það fór það á flug," segir Ragnar. „Í raun má segja að hugmyndin sé komin hringinn því vélin er komin á skemmtistað."

Þáttaröðin Mér er gamanmál kom út á DVD í gær og Ragnar lofar því að aukaefnið sýni áður óþekkta virkni vélarinnar.

atlifannar@frettabladid.is