Þriðjungur rangt verðmerktur hjá Húsasmiðjunni

Níu verslanir á höfuðborgarsvæðinu hafa ekki sinnt ítrekuðum tilmælum Neytendastofu um réttar verðmerkingar á vörum. Húsasmiðjan við Helluhraun er með hæst hlutfall, eða 32 prósent.

Neytendastofa kannaði verðmerkingar í þrjátíu verslunum á höfðuðborgarsvæðinu í lok maí þessa árs. Fimmtán verslanir fengu athugasemdir varðandi rangar merkingar. Áframhaldandi könnun var svo gerð í byrjun júlí.

„Þetta verður að laga til að forðast sektir,“ segir Matthildur Sveinsdóttir, lögfræðingur hjá Neytendastofu, sem segir reglurnar sem verslanir eigi að fylgja vera mjög einfaldar og skýrar. Hlutfall þeirra verslana sem merkja vitlaust sé hátt miðað við seinni heimsókn.

„Við gerðum margar athugasemdir að þessu sinni og við höfum nýverið byrjað að sekta matvöruverslanir fyrir vitlausar merkingar á vörum. Við sektuðum bæði Krónuna og Hagkaup í vor,“ segir Matthildur.

Fimm af þeim níu verslunum sem sinntu ekki tilmælum Neytendastofu í maí voru með hlutfall athugasemda yfir 20 prósentum nú í júlí. Þær verslanir voru Elko í Skeifunni, Rúmfatalagerinn við Smáratorg og í Skeifunni, Múrbúðin Kletthálsi og Húsasmiðjan Skútuvogi.- sv