Kolólöglegur lánasamningur Lýsingar

Neytendastofa telur að Lýsing hafi brotið ýmis ákvæði neytendalaga við gerð samnings um bílalán manns sem kvartaði við Neytendastofu.

Niðurstaðan hefur áhrif á aðra samninga Lýsingar sem eins háttar til um.

Ágallarnir á samningnum gera það að verkum að viðsemjandinn þarf ekki að borga verðtryggingu af innlendum hluta lánsins, vaxtaálag eða breytilega vexti, vegna þess að það gleymdist að tilgreina þessi atriði með fullnægjandi hætti í samningnum, að því er fram kemur í ákvörðun Neytendastofu.

Viðsemjandinn kvartaði yfir þessu til Neytendastofu og viðurkennir Lýsing í greinargerð sinni til Neytendastofu að ýmis mistök hafi verið gerð við samningsgerðina. Ákvörðun Neytendastofu er bindandi og leggur þá skyldu á Lýsingu að bregðast við og láta af háttsemi sinni.

Þórunn Anna Árnadóttir, sviðsstjóri hjá Neytendastofu, segir augljóst að ekki hafi verið vandað til samningsgerðarinnar hjá Lýsingu. Hún getur ekki sagt til um hvaða þetta þýðir fyrir lántakann í krónum talið, enda fari það eftir lánsfjárhæð, lánstíma og öðru.

Þórunn segir að Neytendastofa hafi fengið ábendingar um sambærileg mistök á fleiri samningum og að ákvörðunin í þessu tiltekna máli ætti að gilda um alla samninga þar sem eins var farið.

Í ákvörðun Neytendastofu kemur fram að samkvæmt lögum um neytendalán geti lántakendur átt rétt á skaðabótum hafi lánveitandi ekki veitt fullnægjandi upplýsingar við lántökuna. Slíkar kröfur verði að leysa með samningum eða fyrir dómstólum, enda taki Neytendastofa ekki afstöðu til slíkra skaðabótakrafna.

Í yfirlýsingu frá Lýsingu sem birt var á vef félagsins í gær segir að ekki hafi verið ákveðið hvort ákvörðun Neytendastofu verði vísað til áfrýjunarnefndar neytendamála.

Þar segir enn fremur að athugasemdirnar eigi við um samningsform sem notað hafi verið við takmarkaðan hluta af bílalánasamningum félagsins. Mikilvægt sé að samningsform séu hafin yfir vafa, og því hafi flest samningsform Lýsingar þegar verið endurskoðuð.

Lýsing hefur fjórar vikur til að áfrýja til áfrýjunarnefndar, og þaðan má áfrýja til dómstóla. Héraðsdómur hefur þegar dæmt Lýsingu í óhag í máli þar sem sami ágalli var á samningi hvað verðtrygginguna snerti. - sh, bj