Eurovision-farar fá sex milljónir frá Ríkisútvarpinu

Hera Björk Þórhallsdóttir og Örlygur Smári fá sex milljónir frá RÚV til að undirbúa þátttöku sína í aðalkeppni Eurovision sem fram fer í Osló í lok maí. Þetta er sama upphæð og Óskar Páll Sveinsson og Jóhanna Guðrún fengu í fyrra samkvæmt heimildum Fréttablaðsins. Upphæðin þykir ansi lág enda á hún að standa straum af útgáfu kynningarbæklinga, myndbandsgerðar, búninga og öðru því sem fylgir þátttöku í þessari keppni.Eftir því sem Fréttablaðið kemst næst hefur það gerst að þeir sem hafa keppt fyrir hönd Íslands hafi þurfti að borga með sér svo þeir gætu tekið þátt í þessari keppni. Styrkurinn er greiddur út um leið og sigurlagið hefur verið valið enda hefst þá þrotlaus vinna við undirbúninginn.

Jóhanna Jóhannsdóttir, dagskrárstjóri RÚV, segir heildarupphæðina sem fari í Eurovision-þátttöku í ár þá sömu og í fyrra. „Kostnaðurinn er í kringum 25 milljónir, við getum ekki farið neitt neðar í niðurskurði til að geta sinnt lágmarksþjónustu sem krafist er af okkur í þessari keppni,“ segir Jóhanna og bætir því við að í fyrra og fyrir tveimur árum hafi verið ráðist í mikinn niðurskurð á þessum viðburði. Hún segir stærsta kostnaðaliðinn í þessu vera hótelgistingu, dagpeninga og ferðakostnað því íslenska krónan sé mjög veik gagnvart erlendum gjaldmiðlum um þessar mundir.

Jóhanna segir hópinn sem fari út til Noregs sé lágmarkshópur samkvæmt forsendum og reglum keppninnar. „Jónatan Garðarsson verður farastjóri eins og undanfarin ár og svo verða þrír aðrir starfsmenn frá RÚV á svæðinu, þulur, myndapróducent og tökumaður“ útskýrir Jóhanna. Ekki liggur fyrir hver verður þulur fyrir hönd Íslands en Sigmar Guðmundsson hefur sinnt því starfi með glæsibrag undanfarin ár. Hópurinn sem fylgir tónlistarfólkinu er ögn stærri, í þeim flokki verða höfundur og flytjandi og þeir sem eru með honum á sviðinu, alls sex manns. „Og svo eru það sminka og fólkið með fötin og allt sem tengist því.”

freyrgigja@frettabladid.is