Drukknaði í sjónum við Stykkishólm

Karlmaður sem lagðist til sjósunds frá Stykkishólmi um ellefu leytið í gærkvöldi fannst látinn skömmu eftir klukkan eitt í nótt. Maðurinn sem var íslenskur og fæddur árið 1970 var gestkomandi í Stykkishólmi og ákvað að fá sér sundsprett frá tanga sunnan við höfnina, samkvæmt upplýsingum sem fengust hjá lögreglunni á Snæfellsnesi.

Leit hófst eftir miðnætti þegar maðurinn skilaði sér ekki og voru björgunarsveitir á Snæfellsnesi kallaðir út, en þrír bátar frá Stykkishólmi hófu þegar leit að manninum. Hann fannst látinn eftir klukkan eitt í nótt.

Veður var afar gott í Stykkishólmi í gærkvöldi en sterkir straumar eru við tangann þar sem maðurinn lagðist til sunds, að sögn lögreglu.