500 milljónir í átak gegn atvinnuleysi

Vinnumálastofnun hyggst verja hálfum milljarði í umfangsmikið átak gegn langtímaatvinnuleysi. Stefnt er að því að virkja fjögur þúsund manna hóp til þátttöku í fjölbreytilegum vinnumarkaðsúrræðum á næstu þremur mánuðum.

Átakið ber heitið ÞOR, sem stendur fyrir þekking og reynsla. Markmiðið er að virkja þá sem hafa verið atvinnulausir í tólf mánuði eða lengur til þátttöku í fjölbreytilegum vinnumarkaðsúrræðum. Að þessu sinni er sjónum beint að fólki á aldrinum 30 til 70 ára.

„Já, það má segja að við erum að reyna að leggja þetta upp þannig að fólk komi hingað til að opna pakka, við getum orðað það þannig og í honum séu tækifæri sem geta hjálpað fólki að komast úr atvinnuleysi í vinnu," segir Gissur Pétursson forstjóri Vinnumálastofnunar.

Fjögur þúsund manns hafa verið atvinnulausir í meira en eitt ár og hefur Vinnumálastofnun sett sér það markmið að nálgast þá alla fyrir 1. nóvember næstkomandi. Skylda er að taka þátt en boðið verður upp á námskeið, fyrirlestra og ýmis náms- og vinnutengd úrræði.

„Þetta er merkilegt og mikilvægt mannbótaverkefni, ég er sannfærður um að það mun leiða til þess að fólk mun eiga auðveldara með að fá vinnu en ella," segir Árni Páll Árnason félagsmálaráðhera.

En hvað vill hann segja við þá sem sitja heima og hafa verið atvinnulausir í meira en eitt ár um þetta verkefni? „Við erum ekki að kalla á fólk til að láta það húkka í biðröð eða láta það hanga hérna og gera ekkert. Við erum að kalla á fólk og bjóða því upp á tækifæri, tækifæri til að bæta við sig í þekkingu, styðja það til að fá vinnu, mikilvægt að grípa það," segir Árni Páll.