Stöð 2 braut ekki gegn útvarpslögum

Fyrirkomulag kosningasjónvarps Stöðvar 2 daginn fyrir síðustu borgarstjórnarkosningar fól ekki í sér mismunun samkvæmt útvarpslögum. Þetta er niðurstaða útvarpsréttarnefndar sem hefur fjallað um kæru þess efnis.

Fyrirkomulag kosningasjónvarps Stöðvar 2 var þannig að oddvitum þeirra fimm flokka sem mældust með mest fylgi í skoðanakönnunum í aðdraganda kosninga var boðið að taka þátt í umræðum í sjónvarpsþætti á Stöð 2. Fulltrúum þriggja annarra framboða var hins vegar boðið að tjá skoðanir sínar í stuttum viðtölum. Þessu vildu fulltrúar Reykjavíkurframboðsins ekki una og kærðu því til útvarpsréttarnefndar.

Í greinagerð útvarpsréttarnefndar segir að sjónvarpsstöðvum sé heimilt innan eðlilegra marka að taka tillit til þess hvaða hljómgrunn framboð hafa fengið og sé í þeim efnum meðal annars rétt að hafa til hliðsjónar skoðanakannanir í aðdraganda kosninga. Að öðrum kosti sé viðbúið að mikill fjöldi framboða, með litla raunhæfa möguleika á að komast til áhrifa, taki drjúgan hluta af útsendingartíma og hamli þannig að kjósendum gefist viðhlítandi tækifæri á að kynna sér stefnumál þeirra framboða sem líklegast sé að nái nægjanlegum fjölda atkvæða til að koma að fulltrúa í borgarstjórn.

Útvarpsréttarnefnd segir að þegar þess sé gætt að mat Stöðvar 2 á því hvaða framboð hefðu fengið hljómgrunn hafi verið málefnalegt verði ekki talið að fyrirkomulag kosningasjónvarpsins hafi farið í bága við 9. grein útvarpslaga. Sé þá jafnframt haft í huga að öllum framboðum hafi verið gert kleift að kynna stefnumál sín.