Á annað hundrað börn send árlega í fóstur

Árlega eru á annað hundrað börn send í fóstur, segir Steinunn Bergmann félagsráðgjafi hjá Barnaverndastofu. Barnaverndarstofa hefur yfirumsjón með fósturmálum og metur hæfni fósturforeldra.

Steinunn segir að fjöldi barna sem send eru árlega hafi verið nokkuð stöðugur undanfarin ár. Að hennar sögn dvelja börn, sem send eru í fóstur, allt frá þremur mánuðum og upp í tvö ár í fóstrinu. Sé þörf á lengri tíma er barnið sett í varanlegt fóstur. Steinunn segir að fjölmargir fullorðnir einstaklingar séu á skrá og séu reiðubúnir að taka að sér börn.

Fjögur meðferðarheimili rekin

Vísir greindi frá því í morgun að Götusmiðjunni, sem er meðferðarheimili, rekið í samvinnu við Barnaverndastofu, yrði lokað varanlega. Þar með eru einungis tvö meðferðarheimili rekin fyrir börn og unglinga. Annað er að Laugarlandi, en hitt að Háholti í Skagafirði. Þriðja heimilið opnar í haust að Geldingarlæk og Meðferðarstöð ríkisins, Stuðlar, er rekið í Reykjavík.

Steinunn segir að eftirspurn eftir vistun á meðferðarheimilum hafi minnkað verulega undanfarin ár og meiri áhersla lögð á þjónustu í nærumhverfi barnsins. „Við erum með svokölluð fjölkerfameðferðarteymi (MST). Þau veita meðferðina heim í stað þess að vista börnin utan heimila," segir Steinunn. Hún bendir á að rannsóknir sýni að langtímaáhrif verði meiri ef barn fær meðferð innan heimilis heldur en utan þess.