Þorleifur ítrekar tillögu um að rannsóknarnefnd taki til starfa

Þorleifur Gunnlaugsson, varaborgarfulltrúi VG, lagði til í borgarráði í dag að skipuð yrði nefnd þriggja óháðra sérfræðinga til að yfirfara stjórnkerfi og stjórnsýslu Reykjavíkurborgar. Tillagan var upphaflega lögð fram 6. maí síðastliðinn en síðan þá hefur ekkert gerst í málinu.

Samkvæmt tillögunni er rannsóknarnefnd ætlað að kanna stjórnsýslu borgarinnar auk þess sem hún ætti að kanna hvort einstakir embættismenn, borgarfulltrúar eða frambjóðendur til borgarstjórnar hafi hagnýtt sér persónulega eða í þágu síns flokks tengsl við fjársterka aðila sem hafa átt í viðskiptum við borgina.

Þorleifur vill að skipað verði í nefndina fyrir 12. ágúst næstkomandi.