Saka Jón Gnarr um að brjóta siðareglur

Borgarráðsfulltrúar Sjálfstæðisflokksins og Vinstri grænna segja að Jón Gnarr borgarstjóri brjóti siðareglur borgarstjórnar með því að semja við fyrirtæki um ókeypis notkun á bifreið fyrir embætti sitt. Segja borgarfulltrúarnir að ákvörðunin hljóti jafnframt að vera í andstöðu við og vekja spurningar um það gagnsæi og jafnræði sem nauðsynlegt sé að viðhafa í opinberri stjórnsýslu.

Tilkynnt var um það síðastliðinn föstudag að Jón Gnarr borgarstjóri hafi tekið í notkun vistvænan bíl, af gerðinni Ford Explorer, sem embættinu hafi verið lánað tímabundið. Samningur um notkun bílsins var gerður við Íslenska Nýorku, sem er í eigu nokkurra opinberra aðila og þriggja erlendra fyrirtækja, eftir því sem fram kemur í fundargerð borgarráðs frá því í dag.