Milljóna afgangur af fjárframlögum til tannlækna

Tæplega þrjú hundruð milljóna afgangur var af fjárframlögum til tannlækninga á síðasta ári. Árin 2001 til 2009 var afgangurinn 784 milljónir króna.

Fjárframlög til tannlækninga voru rúmar 1.666 milljónir króna og er því tæplega 20 prósenta afgangur. Formaður Tannlæknafélags Íslands, Sigurður Benediktsson, gagnrýnir þetta harðlega, meðal annars í grein í Fréttablaðinu í dag. „Ráðherra setur ráðherragjaldskrá sem segir til um hvað mikið er endurgreitt frá ríkinu. Gjaldskrá tannlækna er síðan frjáls og greiðir sjúklingurinn mismuninn,“ segir Sigurður. Gjaldskrá ráðherra hefur ekki verið hækkuð í mörg ár, en verðlag hefur breyst mikið. Þetta leiðir til þess að sjúklingar þurfa sífellt að borga hærri hlut, að sögn Sigurðar.

Sigurður bendir á það í grein sinni að íslensk börn séu með tvöfalt fleiri tannskemmdir en börn í nágrannalöndunum, samkvæmt rannsóknum. Hann segir að ef afgangur fjárveitinga síðustu níu ára, 800 milljónir, hefði nýst í tannvernd barna hefði mátt laga tæpar 55 þúsund tennur.

Álfheiður Ingadóttir heilbrigðis­ráðherra segir að gjaldskráin sé vissulega gömul og úrelt. „Ég er að ganga frá uppfærðri reglugerð á grunni sjúkratryggingalaganna um tannlækningar almennt og ég á nú ekki von á því að geta hækkað gjaldskrána frekar en annað eins og ríkisfjármálunum er háttað,“ segir hún. Hún segir vera um forgangsröðun að ræða. „Þessi afgangur sem Sigurður vísar til er forsendan fyrir því að ég setti reglugerð um tannlækningar og tannréttingar þeirra sem fæðast með alvarlega galla í munnholi, skarð í góm og tannleysi. Þess vegna þurfti engar aukafjárveitingar þar heldur er ég að nýta þær fjárveitingar sem Alþingi hefur sett í tannlækningar til þess að rétta hlut þessa hóps.“

Sigurður segist ánægður með bót á málefnum þessa hóps. Hann segir jafnframt allt stefna í að afgangur verði af fjárframlögunum á þessu ári og Sigtryggur Ari Arason, forstjóri Sjúkratrygginga Íslands, gerir einnig ráð fyrir því. Álfheiður á ekki von á því. „Ég á von á því að það nýtist allt það fé sem Alþingi setti í tannlækningar vegna þess að það er búið að bæta stöðu þessa hóps verulega. Þetta er forgangsröðunin sem ég valdi.“ thorunn@frettabladid.is