Ferðamenn fari gætilega umhverfis Eyjafjallajökul

Veðurstofa Íslands spáir mikilli rigningu á Eyjafjallajökli á morgun.

Spáin hljóðar uppá að rigni frá klukkan 9 í fyrramálið og alveg fram til klukkan 17. Á tímabilinu milli klukkan 11 og 15 er spáð allt að 10 millimetra úrkomu á klukkustund. Reiknað er með að skilin fari yfir jökulinn á tímabilinu milli klukkan 10 og 12 en þá má reikna með að vindhraði verði allt að 20 metrar á sekúndu á fjallinu og að úrkoma verði áköfust þegar skilin fara yfir.

„Það er ljóst að vöxtur verður í ám umhverfis jökulinn fram á kvöld. Ástæða er til að minna þá sem eru á ferð yfir óbrúaðar ár að gæta varúðar," segir í tilkynningu frá almannavörnum.