Útflutningur á hval kærður til Interpol

Alþjóða dýraverndunarsjóðurinn (IFAW) hefur kært útflutning á hvalaafurðum frá Íslandi til þriggja landa til framkvæmdastjórnar Evrópusambandsins (ESB), Alþjóðalögreglunnar (Interpol) og Alþjóða tollastofnunarinnar.

Afurðirnar sem um ræðir eru 134 tonn af frystum hvalaafurðum til Japans og 250 kíló af frystu hvalkjöti til Lettlands í janúar síðastliðnum auk tveggja sendinga af hvalmjöli til Danmerkur í janúar og mars árið 2009. Tilefni kærunnar eru upplýsingar um útfluttar vörur frá Hagstofu Íslands. Sjóðurinn hefur einnig sent fjórum skrifstofum CITES (samningur um alþjóðaverslun með tegundir villtra dýra og plantna í útrýmingarhættu) upplýsingar um viðskiptin.

Sigursteinn Másson, talsmaður IFAW á Íslandi, segir málið grafalvarlegt í ljósi þess að lög og reglur ESB banni alfarið viðskipti sem þessi, auk CITES-sáttmálans sem Ísland, Lettland og Danmörk eru aðilar að. „Þarna er í raun um mjög alvarlegan atburð að ræða út frá alþjóðalögum og þess vegna vekur IFAW athygli á þessu og kæra til viðeigandi yfirvalda.“

Sigursteinn segir engu skipta þó að um tiltölulega lítið magn hvalaafurða sé að ræða og IFAW hafi ekki fengið staðfest hverjir standa að baki útflutningnum héðan.

„Við gerum hins vegar ráð fyrir því að yfirvöld fari ofan í saumana á því hverjir eru að brjóta lög og reglur.“ Hann segir að yfirvöld í Lettlandi og Danmörku hafi ekki haft upplýsingar um viðskiptin. „Þar er þetta litið mjög alvarlegum augum og ég tel að það verði tekið hart á þessu.“

Kristján Loftsson, framkvæmdastjóri Hvals hf., staðfestir að „smáræði“ af hvalaafurðum hafi verið flutt út til Japans í janúar. Hins vegar veit hann ekki hver stendur að baki viðskiptunum til Lettlands og Danmerkur.

„Það kæmi mér ekkert á óvart ef ég kæmist að því að Sigursteinn stæði sjálfur fyrir þessu. Þessir menn gera allt sem í þeirra valdi stendur til að vekja athygli á sér,“ segir Kristján.

Gunnar Bergmann Jónsson, framkvæmdastjóri Félags hrefnuveiðimanna, segir að ekkert hrefnukjöt hafi verið flutt út.

„Hins vegar er um svo lítið magn að ræða að ekki er hægt að útiloka að Letti hafi keypt kjöt hérlendis og sent til heimalandsins.“

Hagstofa Íslands staðfesti við Fréttablaðið að upplýsingar IFAW um útflutninginn eru allar nákvæmar.

svavar@frettabladid.is