Framburður Hreiðars Más stangast á við aðra

Framburður Hreiðars Más Sigurðssonar, fyrrverandi forstjóra Kaupþings, stangaðist á við framburð annarra einstaklinga sem hafa gefið skýrslu í rannsókn sérstaks saksóknara samkvæmt fréttavef Viðskiptablaðsins sem hefur úrskurð Hæstaréttar undir höndum.

Á vef Viðskiptablaðsins segir ennfremur að embætti sérstaks saksóknara telji að Hreiðar Már, sem var úrskurðaður í 12 daga gæsluvarðhald, sé líklegur til þess að torvelda rannsókn málsins og því hafi verið farið fram á gæsluvarðhald yfir Hreiðari. Hæstiréttur féllst á gæsluvarðhaldið en einn dómari, Jón Steinar Gunnlaugsson, skilaði inn sératkvæði.

Á vef Viðskiptablaðsins segir að í dómnum komi fram að ætluð brot, sem Hreiðar Már er grunaður um, eiga að hafa verið framin á „nokkrum árum og til loka árs 2008".

Málið byggir meðal annars á rannsókn Fjármálaeftirlitsins en kærur bárust til embættis sérstaks saksóknara 13. mars 2009 og 22. mars 2010. Hreiðar Már hefur neitað sök.

Hægt er að nálgast frétt Viðskiptablaðsins hér.