Skrifað undir samning um sjálfstætt starfandi leikskóla

Hanna Birna Kristjánsdóttir borgarstjóri hefur undirritað nýja samninga um rekstrarframlög til 19 sjálfstætt starfandi leikskóla í Reykjavík. Markmiðið með samningunum er að tryggja að sama fé fylgi barni óháð því hvaða rekstrarformi leikskólinn starfar eftir án þess að draga úr sérstöðu og séreinkennum hvers skóla.

Í fréttatilkynningu frá borginni kemur fram að mikil vinna liggi að baki samningunum þar sem farið var út í að kostnaðargreina hvert leikskólapláss í borgarkerfinu til að tryggja jafnræði. Rösklega níu hundruð börn dvelji í sjálfstætt starfandi leikskólum í borginni og hafi leikskólaplássum í þeim fjölgað um tæp fjögur hundruð frá árinu 2006. Ekki er gert ráð fyrir viðbótarkostnaði vegna þessara samninga í fjárhagsáætlun borgarinnar á yfirstandandi ári.

Samið er að nýju við 17 rekstraraðila um rekstrarframlög vegna 19 sjálfstætt starfandi leikskóla. Þar af ná samningarnir til fimm svokallaðra ungbarnaleikskóla fyrir börn á aldrinum 6 til 36 mánaða.