Hætta á að Umboðsmaður skuldara skaðist

„Ég tel að þetta geti skaðað embættið," segir Ásta Sigrún Helgadóttir, forstöðumaður Ráðgjafarstofu um fjármál heimilanna. Hún var í hópi umsækjenda um embætti umboðsmanns skuldara, en Runólfur Ágústsson, fyrrverandi rektor á Bifröst var nýlega skipaður í embættið.

Í gær kom fram Runólfur hefði fengið hundruð milljóna króna að láni vegna hlutabréfaviðskipta fyrir hrun, í gegnum félagið Obduro. Líklegt þykir að Sparisjóður Keflavíkur og fleiri fjármálastofnanir verði að afskrifa háar fjárhæðir vegna þess. Fram kom í fréttum Stöðvar 2 í gær að félagsmálaráðuneytið taldi sér ekki hafa verið kunnugt um þetta þegar Runólfur var skipaður. Hvorki Runólfur né ráðuneytið hafa viljað ræða málið við fréttastofu.

Ásta Sigrún segir þessa fortíð Runólfs vera bagalega. „Þetta er viðkvæmur og erfiður málaflokkur og mikilvægt að þeir sem sinni þessum störfum séu með allt sitt á hreinu." Hún hefur krafist skriflegs rökstuðings frá félagsmálaráðuneytinu vegna skipunarinnar. Rökstuðninginn vill hún fá ekki seinna en 10. ágúst og að honum fylgi gögn, þar á meðal hæfismat sem umsækjendur gengust undir. Þegar rökstuðningurinn og gögnin berist ákveði hún næstu skref, sem gætu falist í kvörtun til Umboðsmanns Alþingis eða Jafnréttisstofu.

Hún segist hafa fengið þó nokkur viðbrögð við þessu. „Síminn hjá mér hefur ekki stoppað og ólíklegasta fólk úr öllum flokkum hefur þakkað mér fyrir að gera þetta," segir Ásta Sigrún Helgadóttir. Ásta Sigrún hefur stýrt Ráðgjafarstofu um fjármál heimilanna í sjö ár, en vann áður í félagsmálaráðuneytinu og hjá félagsþjónustunni í Reykjavík. Hún er lögfræðingur