Umferðastofa: Tvo tíma tekur að aka til Landeyjahafnar

Umferðarstofa segir að þeir sem hyggjast aka frá Reykjavík til Landeyjarhafnar þurfa að gera ráð fyrir 2 klukkustunda akstri ef aðstæður eru góðar.

Hafa skal í huga að á leiðinni er ekið í gegnum þrjá þéttbýliskjarna þar sem hraði er takmarkaður miðað við það sem almennt gerist á leiðinni. Um Verslunarmannahelgina má án efa búast við mikilli umferð og getur þá jafnvel þurft að gera ráð fyrir lengri tíma.

Eitthvað hefur borið á því að ökumenn hafi farið of hratt um Suðurlandsveg á leið sinni austur að Landeyjarhöfn og má það í einhverjum tilfellum rekja til þeirrar ranghugmyndar að það taki aðeins eina og hálfa klukkustund að aka leiðina frá Reykjavík að Landeyjarhöfn. Það er ógerlegt að aka þessa vegalengd á svo skömmum tíma nema ekið sé á köflum langt yfir leyfðum hámarkshraða.

Akstur frá höfuðborgarsvæðinu austur í Þorlákshöfn, þaðan sem Herfjólfur fór, tók aðeins 40 til 50 mínútur.