Mannfólk til sýnis í fyrsta sinn

Mannskepnan verður í fyrsta sinn til sýnis í sínu náttúrulega umhverfi í Fjölskyldu- og húsdýragarðinum um næstu helgi. Sýndir verða þrír karlar og ein kona.

Sýningin er partur af sumarverkefni fyrir ungt fólk á aldrinum 16 til 18 ára og er stýrt af leikurunum Ævari Þór Benediktssyni og Hilmi Jenssyni.

„Krakkarnir eru búnir að vera í garðinum með alls kyns uppákomur í sumar og við ætlum að klára með þessari sýningu,“ segir Ævar Þór. „Þetta er gert til þess að lífga upp á garðinn og leyfa gestum garðsins að taka þátt í skemmtuninni.“

Mannskepnurnar verða til sýnis frá klukkan tíu, laugardag og sunnudag. Klukkan eitt verða sýningargripirnir fóðraðir með hamborgurum og geta allir fylgst með því. Vert er að taka fram að stranglega er bannað að fóðra skepnurnar, líkt og önnur dýr í garðinum.

Búrinu, sem venjulega er notað fyrir dýr í hremmingum, verður kirfilega læst og segir Ævar að sýningargripirnir kæmust ekki út þótt þeir vildu.

„Þau fá bolta, sjónvarp og hugsanlega eina bók,“ segir hann. „Það er mjög mikilvægt að halda þeim í sínu náttúrulega umhverfi.“- sv