Birgitta krefst svara vegna vatnsréttinda

Birgitta Jónsdóttir, alþingismaður Hreyfingarinnar, hefur óskað eftir því að fulltrúi Íslands í fastanefnd Sameinuðu þjóðanna og Össur Skarphéðinsson utanríkisráðherra verði kallaðir fyrir nefndina vegna frétta af því að Ísland sat hjá við atkvæðagreiðslu á Allsherjarþingi Sameinuðu þjóðanna í gær, þar sem samþykkt var tillaga um að aðgangur að hreinu vatni verði mannréttindi.

Birgitta segist í tölvupósti sem hún sendi Árna Þór Sigurðssyni, formanni utanríkismálanefndar, að hún vildi vita hvort það sé stefna ríkisstjórnarinnar að taka ekki afstöðu til þess hvort að aðgangur að vatni teljist til mannréttinda. Birgitta segist jafnframt vilja vita hvort að það sé hefð fyrir því að mikilvæg mál af þessu tagi séu ekki rædd á þinginu eða í þingnefndum áður en greidd eru atkvæði um þau á vettvangi Sameinuðu þjóðanna.