Ráðherra fagnar viðræðum

Carl Bildt, utanríkisráðherra Svíþjóðar, segir líkindi með stöðu Íslendinga í upphafi aðildarviðræðna við ESB og stöðu Svía þegar þeir gengu í sambandið.

Í færslu á heimasíðu Bildts á þriðjudag segir hann upphaf viðræðnanna merkilegan dag í sögu Norðurlanda. Hann nefnir að skoðanakannanir bendi til þess að Íslendingar séu neikvæðir í garð ESB en minnir á að það sama hafi gilt um Svía þegar aðildarviðræður þeirra hófust árið 1992.

Hann heitir Íslandi stuðningi í viðræðunum og segist vonast eftir því að Íslendingar segi já þegar kosið verður um aðild. - mþl